Sunday 13 June 2021  
ನಮ್ಮನ್ನು ಹಿಂಬಾಲಿಸಿ :
Ajeya Kannada Daily

ಭೀಮ್ ಸುದ್ದಿ

ವಾರ್ಡ್‌ಗೊಂದು ಕೋವಿಡ್ ಸುರಕ್ಷತಾ ತಂಡ: ಶಾಸಕ ಆಯನೂರು ಮಂಜುನಾಥ್ ಕರೆ

ಆಯಾ ವಾರ್ಡ್‌ನಲ್ಲಿರುವ ದಾನಿಗಳನ್ನು ಗುರುತಿಸಿ ಅವರಿಂದ ನೆರವು ಪಡೆದು ಬಡ ಸೋಂಕಿತರಿಗೆ ಊಟ, ಉಪಚಾರ, ಔಷಧಿ, ಮಾಸ್ಕ್‌ಗಳನ್ನು ನೀಡಬೇಕು. ಸಂಚಾರ ನಿಯಮಗಳನ್ನು ನೋಡಿಕೊಳ್ಳಬೇಕು. ಪ್ರತಿ ವಾರ್ಡಿನಲ್ಲೂ ಒಂದು ಆರೈಕೆ ಕೇಂದ್ರ ಇರಬೇಕು ಎಂದರು.

2021-05-21 05:30:00, ajeyanews.com

Ajeya Imageಶಿವಮೊಗ್ಗ, ಮೇ 21:
ಕೊರೋನಾ ಮಹಾಮಾರಿಯನ್ನು ತಡೆಯಲು ಪಾಲಿಕೆ ವ್ಯಾಪ್ತಿಯಲ್ಲಿ ಪ್ರತಿವಾರ್ಡಿನಲ್ಲಿ ತಂಡಗಳನ್ನು ರಚಿಸಬೇಕು. ಸೋಂಕು ತಗುಲಿದವರನ್ನು ಗುರುತಿಸಿ ಅವರನ್ನು ಆರೈಕೆ ಕೇಂದ್ರಕ್ಕೆ ಸೇರಿಸಲು ಅಗತ್ಯ ಕ್ರಮ ತಕ್ಷಣವೇ ತೆಗೆದುಕೊಳ್ಳಬೇಕು. ಇದಕ್ಕಾಗಿ ಆರೋಗ್ಯ ಸಿಬ್ಬಂದಿಗಳನ್ನು ಕಾಯಬಾರದು ಮತ್ತು ಬಹಳ ಮುಖ್ಯವಾಗಿ ಮನೆಯಲ್ಲಿಯೇ ಚಿಕಿತ್ಸೆ ಪಡೆಯುತ್ತಿರುವ ಸೋಂಕಿತರು ಹೊರಹೋಗದಂತೆ ನೋಡಿಕೊಳ್ಳಬೇಕು. ಜನರ ಜೀವ ಜೀವನ ಕಾಪಾಡುವ ಕೆಲಸವನ್ನು ಪಾಲಿಕೆ ಸದಸ್ಯರೆ ನೋಡಿಕೊಳ್ಳಬೇಕು ಎಂದು ವಿಧಾನಪರಿಷತ್ ಸದಸ್ಯ ಆಯನೂರು ಮಂಜುನಾಥ್ ಸಲಹೆ ನೀಡಿದರು. 

ಅವರು ಇಂದು ಪಾಲಿಕೆ ಸಭಾಂಗಣದಲ್ಲಿ ನಡೆದ ಕೋವಿಡ್ ನಿಯಂತ್ರಣ ಕ್ರಮಗಳ ಕುರಿತು ಪರಿಶೀಲನಾ ಸಭೆಯಲ್ಲಿ ಮಾತನಾಡಿದರು. 

ಆಯಾ ವಾರ್ಡ್‌ನಲ್ಲಿರುವ ದಾನಿಗಳನ್ನು ಗುರುತಿಸಿ ಅವರಿಂದ ನೆರವು ಪಡೆದು ಬಡ ಸೋಂಕಿತರಿಗೆ ಊಟ, ಉಪಚಾರ, ಔಷಧಿ, ಮಾಸ್ಕ್‌ಗಳನ್ನು ನೀಡಬೇಕು. ಸಂಚಾರ ನಿಯಮಗಳನ್ನು ನೋಡಿಕೊಳ್ಳಬೇಕು. ಪ್ರತಿ ವಾರ್ಡಿನಲ್ಲೂ ಒಂದು ಆರೈಕೆ ಕೇಂದ್ರ ಇರಬೇಕು ಎಂದರು. 

ವಿಧಾನ ಪರಿಷತ್ ಸದಸ್ಯ ಎಸ್.ರುದ್ರೇಗೌಡ ಮಾತನಾಡಿ, ಪಾಲಿಕೆಯ ಸದಸ್ಯರ ಜವಾಬ್ದಾರಿ ತುಂಬಾ ಇದೆ. ಕೊರೋನಾ ಸೋಂಕಿತರು ಹೆಚ್ಚಾಗಿ ಮನೆಯಲ್ಲಿಯೇ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಸಂದರ್ಭದಲ್ಲಿ ಇವರು ಮನೆಯಿಂದ ಹೊರಬರುತ್ತಿದ್ದಾರೆ ಎಂಬ ಮಾಹಿತಿಯಿದ್ದು, ಈ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಆದಷ್ಟು ಆಸ್ಪತ್ರೆಯಲ್ಲಿ ಇರುವಂತೆ ನೋಡಿಕೊಳ್ಳಬೇಕು ಮತ್ತು ಸೋಂಕಿತರಿಗೆ ಸಂಘ ಸಂಸ್ಥೆಗಳ ಜೊತೆ ಸೇರಿಕೊಂಡು ಅಗತ್ಯ ನೆರವು ನೀಡಬೇಕು. ಪಾಲಿಕೆ ಸದಸ್ಯರು ಆರೋಗ್ಯ ಇಲಾಖೆಯ ಜೊತೆ ಸದಾ ಸಂಪರ್ಕವನ್ನಿಟ್ಟುಕೊಳ್ಳಬೇಕು. ಆಗಾಗ ಸಮಾಲೋಚನೆಗಳನ್ನು ನಡೆಸಬೇಕು. ಮಾಹಿತಿಗಳನ್ನು ಸಂಗ್ರಹಿಸಬೇಕು. ರಸ್ತೆಯಲ್ಲಿ ವಿನಾ ಕಾರಣ ಸಂಚರಿಸುತ್ತಿರುವವರ ಬಗ್ಗೆ ಪೊಲೀಸ್ ಇಲಾಖೆಯ ಸಹಕಾರದೊಂದಿಗೆ ನಿಯಂತ್ರಿಸಬೇಕು ಎಂದರು. 

ಸಂಘ ಸಂಸ್ಥೆಗಳ ನೆರವನ್ನು ಪಡೆದು ಪ್ರತಿ ಸದಸ್ಯರು ತಮ್ಮ ತಮ್ಮ ವಾರ್ಡ್‌ನಲ್ಲಿ ಕೋವಿಡ್ ನಿಯಂತ್ರಣಕ್ಕೆ ಹೆಚ್ಚಿನ ಗಮನ ಕೊಡಬೇಕು. ಕಳೆದ ಬಾರಿ ಫುಡ್‌ಕಿಟ್ ಪ್ರತಿವಾರ್ಡಿಗೆ 1 ಸಾವಿರ ನೀಡಿದ್ದೆವು. ಅದು ಸಾಲದು ಎಂದು ಎಲ್ಲರು ದೂರು ನೀಡಿದ್ದರು. ಈ ಬಾರಿ ಕೇಂದ್ರ ಮತ್ತು ರಾಜ್ಯ ಸರ್ಕಾರ ಪಡಿತರದಲ್ಲಿ ಅಕ್ಕಿಯನ್ನು ನೀಡುತ್ತಿರುವುದರಿಂದ ಈ ಬಾರಿ ಫುಡ್‌ಕಿಟ್‌ನಲ್ಲಿ ಅಕ್ಕಿ ಮತ್ತು ಗೋಧಿಬಿಟ್ಟು ಉಳಿದ ಅಗತ್ಯ ವಸ್ತುಗಳನ್ನು ನೀಡುವುದರ ಬಗ್ಗೆ ತೀರ್ಮಾನ ತೆಗೆದುಕೊಳ್ಳಬೇಕು. 

- ಕೆ.ಎಸ್. ಈಶ್ವರಪ್ಪ, ಜಿಲ್ಲಾ ಉಸ್ತುವಾರಿ ಸಚಿವ

ಆಡಳಿತ ಪಕ್ಷದ ನಾಯಕ ಚನ್ನಬಸಪ್ಪ ಮಾತನಾಡಿ, ಇಂದಿರಾ ಕ್ಯಾಂಟೀನ್‌ನಲ್ಲಿ ಪಾಲಿಕೆ ವತಿಯಿಂದ ಉಚಿತ ಆಹಾರ ನೀಡುತ್ತಿದ್ದು, ಅಲ್ಲಿ ಎಲ್ಲಾ ಮೂಲಭೂತ ಸೌಲಭ್ಯ ಕಲ್ಪಿಸಬೇಕಾಗಿದೆ ಮತ್ತು ಆಹಾರದ ಗುಣಮಟ್ಟದ ಬಗ್ಗೆ ಪರಿಶೀಲನೆ ನಡೆಸಬೇಕಾಗಿದೆ. ಈಗಿರುವ ಸಿಬ್ಬಂದಿಗಳನ್ನು ಎಲ್ಲಾ ವಾರ್ಡ್‌ಗಳಿಗೂ ಜೋಡಿಸಿಕೊಂಡು ಕೆಲಸ ಮಾಡಬೇಕಾಗಿದೆ. ವೆಂಟಿಲೇಟರ್ ಮತ್ತು ಆಕ್ಸಿಜನ್ ಕಿಟ್‌ ಗಳನ್ನು ಕೂಡ ಪಾಲಿಕೆಯ ಕಾಯ್ದಿರಿಸಿದ ಅನುದಾನದಲ್ಲಿ ಅರ್ಹರಿಗೆ ನೀಡಬಹುದಾಗಿದೆ. ದಾನಿಗಳಿಂದ ನೆರವನ್ನು ಪಡೆದು ಕಳೆದ ಬಾರಿಯಂತೆ ಪಾಲಿಕೆಯಲ್ಲಿ ಕೇಂದ್ರ ತೆರೆದು ಸಂಗ್ರಹಿಸಿ ಅರ್ಹರಿಗೆ ನೀಡುವ ಕಾರ್ಯಕ್ರಮ ಹಮ್ಮಿಕೊಳ್ಳಬೇಕು ಎಂದರು.

ಮಾತಿನ ಜಟಾಪಟಿ 

ಆಯುಕ್ತರು ಮಾತನಾಡಿ, ಪಾಲಿಕೆಯಲ್ಲಿ ಹಣದ ಕೊರತೆಯಿದೆ. ಕಳೆದ ಬಾರಿ ಕಿಟ್ ನೀಡಲು 1.40 ಕೋಟಿ  ರೂ. ಖರ್ಚಾಗಿತ್ತು. ಜೂನ್ ಒಳಗೆ ಈ ಬಾರಿ 30 ಕೋಟಿ ರೂ. ಆಸ್ತಿ ತೆರಿಗೆ ಸಂಗ್ರಹದ ಗುರಿಯಿತ್ತು. ಆದರೆ ಕೋವಿಡ್‌ ನಿಂದಾಗಿ ಈ ವರೆಗೆ ಕೇವಲ 1.60 ಕೋಟಿ ರೂ. ಸಂಗ್ರಹವಾಗಿದೆ. ಅದು ನೌಕರರ ಸಂಬಳಕ್ಕೆ ಮತ್ತಿತರ ಖರ್ಚುಗಳಿಗೆ ವಿನಿಯೋಗವಾಗಿದೆ ಎಂದರು. 

ಸದಸ್ಯ ಯೋಗೀಶ್ ಮಾತನಾಡಿ, ಯಾವುದೇ ಯೋಜನೆ ಕಾರ್ಯಗತಗೊಳಿಸಲು ಪಾಲಿಕೆಯಲ್ಲಿ ಹಣವಿಲ್ಲ. ಕೇವಲ 84 ಲಕ್ಷ ರೂ. ಇದೆ. ನೀವು ಎಲ್ಲಿಂದ ಹಣ ಜೋಡಿಸುತ್ತೀರಿ ಎಂದು ಪ್ರಶ್ನೆ ಮಾಡಿದರು. 

ಉಪಮೇಯರ್ ಶಂಕರ್‌ಗನ್ನಿ ಹಾಗೂ ಯೋಗೀಶ್ ನಡುವೆ ಮಾತಿನ ಚಕಮಕಿ ನಡೆಯಿತು. ಸಚಿವರು ಸರ್ಕಾರದಿಂದ 2.10 ಕೋಟಿ ರೂ. ಅನುದಾನ ಕೊಡಿಸುತ್ತೇನೆ. ಕಳೆದ ಬಾರಿಗಿಂತ ಒಂದೂವರೆ ಪಟ್ಟು ಹೆಚ್ಚು ಫುಡ್‌ಕಿಟ್‌ಗಳನ್ನು ಸದಸ್ಯರ ಬೇಡಿಕೆ ಮೇರೆಗೆ ಸಮಿತಿ ತೀರ್ಮಾನಿಸಿದ ವಸ್ತುಗಳನ್ನು ಹಾಕಿ ಅಕ್ಕಿ ಮತ್ತು ಗೋಧಿಯನ್ನು ಬಿಟ್ಟು ಉಳಿದ ಪದಾರ್ಥಗಳನ್ನು ನಿಡೋಣ. ಫುಡ್‌ಕಿಟ್ ಚರ್ಚೆಗೆ ತೆರೆ ಎಳೆದರು. 

ಸದಸ್ಯ ನಾಗರಜ್ ಕಂಕಾರಿ ಮಾತನಾಡಿ, ಐಸೋಲೇಷನ್ ಗೊಂದಲವಿದ್ದು, ಸಾರ್ವಜನಿಕರು ಕೆಲವರು ಮನೆಯಲ್ಲೇ ಐಸೋಲೇಷನ್‌ ನಲ್ಲಿದ್ದು, ಇನ್ನು ಕೆಲವರಿಗೆ ನಿರಾಕರಣೆ ಮಾಡುತ್ತಿರುವುದರಿಂದ ಸಾರ್ವಜನಿಕರು ದೂರವಾಣಿಮೂಲಕ ಆಕ್ಷೇಪ ವ್ಯಕ್ತಪಡಿಸುತ್ತಿದ್ದಾರೆ. ಇದನ್ನು ಮೊದಲು ಸರಿಪಡಿಸಿ ಸಂಜೆ ಹೊತ್ತು ಪೊಲೀಸರು ಕಾಣದೆ ಇರುವುದರಿಂದ ಸಾರ್ವಜನಿಕರ ಓಡಾಟ ಜಾಸ್ತಿಯಾಗಿದ್ದು, ಇದು ಕೂಡ ಸೋಂಕು ಹೆಚ್ಚಾಗಲು ಕಾರಣವಾಗಿದೆ. ಇದನ್ನು ರಕ್ಷಣಾಧಿಕಾರಿಗಳ ಗಮನಕ್ಕೆ ತರಬೇಕು. ವಾರ್ಡ್ ಸಮುದಾಯಭವನಗಳಲ್ಲಿ ಸಾರ್ವಜನಿಕ ಮತ್ತು ಸಂಘ ಸಂಸ್ಥೆಗಳ ನೆರವಿನೊಂದಿಗೆ ಐಸೋಲೇಷನ್ ವಾರ್ಡ್‌ಗಳನ್ನು ತೆರೆಯಬೇಕು ಎಂದರು. 

ಸಭೆಯಲ್ಲಿ ಮೇಯರ್ ಸುನಿತಾ ಅಣ್ಣಪ್ಪ, ವಿಧಾನ ಪರಿಷತ್ ಸದಸ್ಯ ಆರ್.ಪ್ರಸನ್ನ ಕುಮಾರ್, ಅಪರ ಜಿಲ್ಲಾಧಿಕಾರಿ ಜಿ.ಅನುರಾಧ, ಪಾಲಿಕೆ ಸದಸ್ಯರು, ಅಧಿಕಾರಿಗಳು ಭಾಗವಹಿಸಿದ್ದರು. 

ಪದಗಂಟು :         
ಜಾಹಿರಾತು1
ಜಾಹಿರಾತು1

Designed, Developed and Maintained by PRABHAT SERVICES ™  , AJEYA KANNADA DAILY 2019  ©